📄 Abstract
Ang pag-aaral na ito ay naglalayong suriin ang wikang Itawes bilang wika ng komunikasyon, partikular ang pananaw at saloobin ng mga tagapagsalita nito sa Barangay San Vicente, Jones at Barangay Salay, Echague sa Isabela. Gumamit ng descriptive ethnographic design ang pananaliksik, na nilahukan ng 300 pamilyang may lahing Itawes. Ang pangangalap ng datos ay isinagawa sa pamamagitan ng talatanungan, panayam, obserbasyon, at pakikipagkuwentuhan, at ang pagsusuri ay isinagawa gamit ang frequency distribution at weighted mean. Lumitaw sa resulta na may balanseng representasyon ng kasarian at malawak na saklaw ng edad ang mga kalahok, at karamihan sa kanila ay may antas ng elementarya o sekondarya at ang pangunahing hanapbuhay ay pagsasaka. May positibong pananaw ang mga kalahok sa wikang Itawes bilang daluyan ng pagkatuto, pagpapahayag, at pakikipag-ugnayan, subalit may agam-agam sa bisa nito sa akademikong tagumpay. Filipino ang pinakapinipiling wika sa paaralan, habang Itawes naman ang nangingibabaw sa usapang tahanan at pamayanan, na nagpapakita ng nagaganap na language shift. Sa kabila nito, makikita ang patuloy na pagpapahalaga sa wikang Itawes bilang bahagi ng lokal na pagkakakilanlan. Iminumungkahi ng pag-aaral ang pagpapalakas ng mga programang pang-revitalisasyon upang mapanatili ang kasiglahan ng wikang Itawes sa gitna ng lumalakas na impluwensiya ng mga dominanteng wika.
🏷️ Keywords
📚 How to Cite:
Angelica F. Dumon, Rodel B. Guzman , ANG ITAWES BILANG WIKA NG KOMUNIKASYON: MGA PANANAW AT SALOOBIN , Volume 11 , Issue 4, april 2025, EPRA International Journal of Multidisciplinary Research (IJMR) , DOI: https://doi.org/10.36713/epra21216